تجربة | الحل النهائى لمشكلة جلد الوزة

الحل النهائي و الجذري لمشكلة جلد الوزة

جلد الوزة
جلد الوزة
جلد الوزه
جلد الوزة المسمى البلدى لظهور الحبوب و الشعر تحت الجلد

تعالوا اكلمكوا عن مشكله بجد تاعبه بنات كتير اووى نفسياا

وطبعا مفيش حاجه ملهاش حل

بس زى ماكتير قولتلكوا الصبر ثم الصبر والاستمرار على اللى بقولهولكوا
لازم الاستمرار والصبــــــــر
مفيش حاجه هتخفيها فى يوم وليله وصدقووونى هتلاقوا نتيجه هاااايله فى مده قصيره
بصوا على الصور كده ده بيبقى شكلها

الحل النهائى لمشكلة جلد الوزة

فى الاول كده عاوزاكوا تعرفوا ان اسمها العلمى
التقرن الجريبي الشعري ( Keratosis pilaris ) وبالعاميه بنقول عليه chicken skin جلد الفرخه او البطه

ده بيكون عباره ان الجسم كون بزياده بروتين (كرياتين )على الجلد
فاللى بيحصل ان الكرياتين ده بيتراكم حوالين بصيلات الشعر فبتتحبس ومتخرجش بره الجلد
وبتلاقى ده بقا بيظهر على شكل حبوب خشنه اووى وشكلها مقرف ساعات حمرا وساعات ملتهبه وساعات لونها
بيبقى بنى فاتح وده بيختلف من بنت للتانيه
ومع الحمل او بعد الولاده بتزيد المشكله دى

دا الشكل الاولى لجلد الدجاجة . مجرد بروزات ملهاش اي لون . و بتظهر فى الاذرع بالشكل دا و بتختلف فى الرجل لان دايماً الرجل بتكون الحالة الأسوأ .طيب دى بتتكون من ايه ؟ من 3 حاجات مفيش غيرهم

1- وراثة.
2- ارتفاع معدل افراز الجسم للكيراتين .
3- العادات السيئة المتبعة فى ازالة الشعر

الدرجه الاولى
الدرجه التانيه
الدرجه التالته

طيب اسبابها ايه اصلا انا اقولكواا

اول حاجه مش بتشربى مايه كفايه
تانى حاجه نقص فيتامين أ و فيتامين C
تالت حاجه قله الترطيب فبتالى الجلد بيجف اكتر

طب الحل ايه
من الاخر كده هقولكوا عشان انتوا عارفين انا بحب الحلول الجذريه
مش الخلطات والجو ده

اول حاجه لو عندك المشكله دى وشعر تحت الجلد بلاش ارجوكى سويت او واكس او براون
خليكى فى الشفينج بجد هينعم جداا ويحسن الحوار ده
لان اى ازاله من الجذور بتزود المشكله دى

– اول حاجة هنتبعها اثناء العلاج منتجات الشعر متوصلش لجسمك . شامبو او بلسم انا عارفة اثناء الشطف بينزل على الجسم بس
حاولى تبعدى شعرك عن جسمك مش عارفة اغسليه ع الحوض قبل الاستحمام و كدا كدا هو بتغسليه مرة واحدة ف الاسبوع

2- الترطيب المستمر وقاية من امراض جلدية كتير و محارب لامراض كتير عشان كدا كنت بقولكو دايماً الترطيب المستمر
مستمر دى يعنى طول الحياة .

3- السكراب المستمر بردو لازم كل يوم تعملى سكراب خفيف اثناء الشاور بتاعك بأي حاجة انا دايماً اقلكو اهتمو بنفسكو ب أقل القليل
يعنى لو معنكديش سكراب تقدرى تستعملى اي زيت موجود في بيتك زيت زيتون او جوزهند او جوجوبا او حتى زيت ذرة وشوية سكر

نيجي بقى على الروتين الدائم و اللى هيقعد معانا فترة طويلة . لان الموضوع صعب و كمان المنتجات الطبيعية
المفروض بتاخد وقت شوية فى النتيجة . فنستحمل

هنحتاج فيه ايه؟؟
1- فيتامين A و زنك
2- مرهم كارباميد وزيت جوزهند
3- فرشة جسم او ليفة خشنة
4- شاور مناسب
5- صابون وليفة مغربي
6- سكراب خفيف
7- كيس فلام
هنفضي امبوبة الكرباميد فى علبة كريم فاضية و نضيفة ونحط معلقتين او 3 زيت جوزهند
كل يوم قبل ما ننام هناخد شاور ونعمل سكراب خفيف و ننشف طبطبة و ندهن كريم كارباميد و الزيت و نلفه بفلام ونلبس حاجة و ننام

تصحي تانى يوم تشطفيه عادى و تحطيه حتة صغيرة و خلاص تتعاملى عادى تيجي على نص اليوم تمشي
بالفرشة على المنطقة المصابة شوية عشان تحفزى الدورة الدموية فى جسمك لو معنكديش يبقى الليفة البلدى
بعد الغدا تاخدى فيتامين A ,
وكل اسبوعين هتعملى حمام مغربي فى البيت

فى مجموعة احماض ضرورية جدا لمحاربة KP
او التقرن

و هى 1- حمض اللاكتيك
2- حمض السالساليك
3- -حمض السيتريك
4- حمض الجيليكوليك
5- حمض الطرطريك

وهكلمكوا عنهم بالتفاصيل
خلينا اقولكوا الاول البدائل الطبيعيه بتاعه الاحماض دى

فهنجيب بديل ليها من الطبيعية
حمض اللاكتيك دا موجود فى اللبن و اللبن الباودر و الزبادى منتهية الصلاحية

حمض السالساليك موجودة بكميات كبيرة فى السبانخ و الخيار و البطاطس و الطماطم و مشمش و جوافة
و موز و روزمارى و مستردة

حمض السيتريك موجود فى البرتقال و اللمون و الطماطم و الاناناس

احســـــــــن مواد بتقضى على المشكله دى بقا

حمض اللاكتيك – الترتينوين – يوريا – حمض الساليسيليك – الفا هيدروكسي – ريتينول

طب نبتدى كده واحده واحده

اول حاجه تشربى مايه كتيرررررر
ولوعندك نقص فى فيتامين أ ممكن تاخذي بيتا كاروتين ولو مش لاقتيه
فى البديل انك تعوضى النقص ده بالاكل اللى فه الفيتامين ده زى
( الجزر والبطاطا والبروكلــى واللفت والسبانخ والخص والكرنب )

تانى حاجه لازم تقشير
عشان نشيل سطح الجلد عشان نحسن ملمسه وكمان نطلع الشعر اللى تحت الجلد

فى نوعيـــن من التقشير هنعملهم
اول حاجه تقشير بسنفره زى ملح الحليب او اى منتج عندك
وده يتعمل يوم اه ويو لا
بفرشه زى دى كده ولو مش عندك هاتى واحده ولو مفيش هاتى ليفه خشنه
وتدعكى فى كل المناطق اللى عندك فيها المشكله دى
تبلى جسمك شويه مايه وبالفرشاه والسنفره بتاعتك ايا كانت

وكمان تعملى اسكراب ده مرتين بالاسبوع
( سكر +زيت (مش شرط نوع معين ) + نقط ليمون زى الصوره كده
وفى اسكراب تانى كويس كمان
قهوه + سكر + شويه لبن او مايه

يعنى مثلا يوم الاتنين تعملى سكر وزيت وليمون
ويوم الخميس تعملى قهوه والسكر واللبن او المايه
او اليومين نفس الاسكراب مفيش مشكله بس اهم حاجه انك تعملى وخلاص

للشعر اللى تحت الجلد وسايب بثور سودا كده

تغسلى رجلك بميه دافيه وتجيبى زيت زيتون وبالحجر بتاع الرجل الاسود ده وتفضلى تفركى فى المناطق دى بشكل دائرى وبشويش علشان الجلد ميلتهبش نتيجه الحوار ده هتعجبك اوى من اول مره ومع الاستمرارالشعر اللى تحت الجلد هيختفى تماما
وفى بنات كمان بتدهن زيت زيتون وتلف بلاستيك وارب بتاع الاكل وتسيبه طول الليل وبعد كده تفركه برضو الطريقه دى حلوووه جدا وانا بفضلها للى حالتهم صعبه يعنى عندهم شعر كتير تحت الجلد

بجد هتحسى قدايه جسمك بقا نااعم
ده غير ان الاسكرب بتاع القهوه ده مفييييد جداا للى عندهم سليوليت
بعد السنفره لاااااااااازم ترطيب وياريت ياريت
بمرطب زى
لوشن جرجنز لانه فيه aha اللى هيا احماض الفواكه المقشره اللى هتغير الجلد وتقشيره خفيف ودى صورته

أو

كريمات تكون فيها الالفا هيدروكسي بنسب معينه
واى كريم من دول طبعا بنستعملها لمده شهرين وبعدين مرتين بس بالاسبوع
بتحطى على المناطق دى بليل وتغسليها الصبح وطبعا متتعرضيش لشمس ولا ضوء
عشان كده بقولكوا خليها بالليل احسن وكمان ممنوع التقشير او السنفره او الحمام المغربى طول الشهرين دول

الكريمات دى زى

glycolix elite 15% body lotion (جلايكولكس بدي لوشن )
ده هاااايل بعد 10 ايام هتشوفى ازاى هيقشر ويوحد اللون
او

Rexol-AHA وده فى منه تركيزات مختلفه 5-10-15-20 % احماض الفواكه
أو
neostrata lotion plus مكتوب عليه aha 15
او

مقشر كالميوريد ( Calmurid )
وده طبعا كريم للبشره الجافه اووى معرووف
هو فيه10 % يوريا و 5% حمض اللاكتيك
بس بيرطب الجلد جدااا ويقشر بنفس الوقت بطريقه لطيفه وفعاله فعلاا
وده ميستعملش ابداا على مكان الجروح او الملتهبه
وبشيل الشعر اللى تحت الجلد بطريقه هاايله
او

ايزيس فارما للبشره المتحرشفه
هاايل بينعم اووى وبيطلع الشعر من تحت الجلد

او

الليزر بقا
وده خليته اخر حااجه عشان سعره غاالى جدااا فمش نافع لبنات كتير
بس هو بيحل المشكله بنسبه 80%
هو بيضعف الشعر اه وبيطلع خفيف بس اللى بيطلع معظمه بيطلع تحت الجلد

يعنى ممكن تعملى الليزر كخطوه اوولى بس معاه هتمشى على اسكراب السنفره باستمرار
والترطيب دايما عشان الشعر يطلع كويس

بالنسبالة لازالة الشعر :-

بعد ما بتعملى سويت اعملى حاجة من دول

1- نقطة كارباميد على نقطة مضاد حيوى و امسحى المنطقة و اشطوفيها بليل و بعد ما تشطفى هتحطى الكاربميد بزيت جوز الهند

2- بعد ما تخلصي هتحطى مضاد حيوى و بعدين تشطفيه بميا ورد و تحطى ماسك ميا الورد والنشا

3- بعد ما تخلصي هتحطى ميا بملح و لما تنشف تشطفيها و تحطى الكارباميد بزيت جوز الهند

الحل النهائى لمشكلة جلد الوزة

جلد الوزه

علاج المسام الواسعه من شركة BIODERMA الفرنسية

علاج المسامات من الصيدليه

خطير عند استعمال مقشرات البشرة

الحل النهائى لمشكلة جلد الوزة تقيمك ؟؟

تقييم المستخدمون: كن أول المصوتون !

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *