الحمل الكاذب عند النساء

الحمل الكاذب عند النساء

الحمل الكاذب عند النساء

حد من حضراتكم سمع الاسم ده قبل كدة ؟؟؟ Pseudocyesis ؟؟!!!

طيب لو قلت لك ان الاسم ده هو نفسه Fake Pregnancy او Phantom Pregnancy يعنى الحمل الشبح او الحمل الكاذب .
الحمل الكاذب عند النساء
الحمل الكاذب عند النساء
 
تقريبا محدش فينا شاف الحمل الكاذب الا فى الافلام العربى بس . لكن هو حقيقة موجود . الست بتحس بكل اعراض الحمل . شهيتها تقل وظهرها يوجعها وصدرها يكبر وبطنها تكبر شوية وتحس بكل اعراض ( غثيان الصباح ) او Morning Sickness وكمان وزنها يزيد وتقولك : انا حاسة بالجنين بيلعب جوة بطنى .
تيجى تعمل اختبار حمل تلاقيه نيجاتيف . تيجى تعمل سونار تلاقى الرحم فاضى . مفيش خيال طفل جوة ومع ذلك هى بتؤكد انها حاسة بالطفل بيرفس جوة بطنها !!!!!
 

3 اسباب للحمل الكاذب عند النساء 

 
1- ست مش بتخلف لانها بتعانى من عقم او تأخر حمل او ست تعرضت لاجهاض اكثر من مرة وبالتالى أصبح عندها رغبة جنونية فى الحمل . طول الوقت بتفكر ازاى تبقى حامل ومش شاغل بالها غير الموضوع ده . ساعتها المخ بيريحها وبيخلق لها حالة جسمانية شديدة الشبه بالحمل عشان نفسيتها ترتاح وتترحم من كثر التفكير .
 
2- ست داخلة على سن اليأس وخايفة موت انها تحمل وهى فى السن ده وتبقى أضحوكة للاهل والجيران او ست تعرضت لاعتداء جنسى وخايفة من الفضيحة . هنا بقى خوف شديد جداا من فكرة الحمل . بس المخ للاسف مش هايتعرف على الحالة انها خوف . هو هايشوف ان الست دى بتفكر فى الحمل وساعتها هايترجم الاحساسات القوية دى الى اعراض شبيهة بالحمل .
 
3- ست عندها سرطان مبيض Ovarian Cancer فساعتها الورم هايفرز هرمونات شبيهة بهرمونات الحمل تماما ويحصل عندها كل اعراض الحمل وعايزة اقولك ان ممكن اختبار الحمل يطلع ايجابى لان الورم بيصنع هرمون حمل بس طبعا السونار هايكشف ان مفيش كيس حمل ومفيش جنين .
 
غالبا الموضوع نفسى . رغبة شديدة فى الحمل او خوف شديد من الحمل .
فى كل الاحوال القلق الزايد وكثرة التفكير هاتخلى الغدة الكظرية تفرز Cortisol وده له مستقبلات على ال Hypothalamus . ساعتها يروح يشغل مستقبلاته ويؤدى الى افرز هرمون اسمه GnIH يعنى Gonadotropin Inhibitory Hormone .

الهرمون ده بيروح يمنع خروج هرمونى FSH and LH من الغدة النخامية وبالتالى مش هايحصل دورة . الست بينقطع عندها الدورة وعشان كدة بتشك فى كونها حامل .
 
كمان الكورتيزول بيقوى من تأثير الجهاز العصبى السبمثاوى على الجهاز الهضمى وبالتالى بتقل حركة الامعاء . وكمان الامعاء بتمتلىء بالغازات .
 
دوران الغازات جوة حركة الامعاء البطيئة والكسلانة بيعطى نفس احساس ركلات الجنين Fetal Kicks بينما هى فى واقع الامر مجرد فرقعات للغازات جوة الامعاء !!!
 
 
بقلم د.نرمين احمد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *