المحاليل الوريديه من الالف للياء

المحاليل الوريديه من الالف للياء

………………………………………..
ما تنساش تعمل مشاركه للبوست لانه طويل علشان يكون موجود ع صفحتك وترجعله في اي وقت وايضا لنشر الفائده
……………………………………………….
حوالي 60% من جسمنا مياه يعني الجسم عباره عن مياه وشويه حاجات تانيين المياه دي متوزعه جوه الجسم في صورتين ” اما داخل الخلايا intracellular او في الاوعيه الدمويه خارج الخلايا extracellular ثلث المياه الي بيحتويها جسمنا بس هو الي خارج الخلايا والي في الاوعيه الدمويه والثلثين في الخلايا
————–
في البدايه احب اوضح شويه key points كدا علي الماشي
1- الاسموزيه osmolarity
هي خاصيه موازنه الضغط بمعني اني لو عندي غشاء علي جانبيه تركيزين مختلفين بيحصل تبادل بين الجانبيه بحيث ان تكون النهايه الاتنين متساويين
يعني التركيز العالي بيسحب مياه من التركيز المنخفض عامله زي فكره المواد الحافظه كدا عندي المواد الحافظه الي بحطها في الملابس وغيره منها بيمص الرطوبه اذاي ؟؟ عن طريق ان الماده دي تركيزها عالي ومحتاجه مياه فتمص المياه من الجو ” تشبيه مش دقيق اوي لكن للتبسيط ”
يبقي

النقطه دي مهمه جدا ما تمشيش الا لما تفهمها لانها اساس كل الي تحت لو ما فهمتهاش ممكن تدخل علي اليوتيوب تجيب شرح ال osmolarity

————————-
2- تفتكر ايه فوايد المحاليل الوريديه دي :-

اولا للتغذيه ودي الحالات الي عندها مشاكل في القناه الهضميه او في غيبوبه او غيره تمنعها من الاكل الطبيعي

ثانيا هي علاج هبوط الضغط ” لانها بتزود كميه الدم داخ الجسم وبالتالي الضغط يزيد ”

ثالثا تصحيح الاليكتروليت ” بمعني المريض الي عنده نقص في الصوديوم او البوتاسيوم بزوده بيها ”

رابعا علاج هبوط السكر ودي حاجه خاصه بمحلول ال dextrose glucose 5 %

خامسا منتجات الدم زي البلازما والصفائح الدمويه ودي بيكون ليها حالات خاصه

سادسا اني ادخل حقن للمريض علي فتره كبيره زي مرضي العنايه لازم ياخد الدواء بمعدل معينه اكيد مش هجيبله نصف لتر من الدواء واعمله تنقيط لكن بحقن الحقنه في المحلول وبيبقي معروف تركيزه وبدي المعدل المناسب

———————
3- اهم حاجه انك تخليك فاكر دايما ان محاليل الوريديه دي مبيتحطش عليها مواد حافظه وانها بتستخدم مره واحده بس
طيب ليه ما حطيناش عليها مواد حافظه ؟؟؟

لان المواد الحافظه هنحتاجها بكميات كبيره في المحاليل علشان اعقم الكميه الكبيره دي ودا طبعا صعب لان المواد الحافظه ضاره جدا علي الكبد وبتعمل تليف في الكبد liver cirrhosis

طيب ايه انواع المحاليل الوريديه :-

• Colloids
• Crystalloids
• Blood and blood products
• Oxygen-carrying solutions
نبدا بقي نتكلم عنهم واحد واحد

————————
>>>اول حاجه ال colloids solution :-<<<<
دا اول محلول معايا عباره عن مياه دايب فيها اليكتروليت ” صوديوم بوتاسيوم ..الخ ” وكمان معاها بروتينات
طيب ليه بروتينات ؟؟؟ علشان التغذيه
برافو انت الي زيك مش لازم يعيش ليوم الثلاث ولا الاربعاء
بروتين علشان البروتينات دي لما احقنها في الدم مبتعرفش تدخل الخلايا يعني مبتخرجش بره قنوات الدم وبالتالي لما تفضل محبوسه في الاوعيه هتكبر حجم الدم وبالتالي الضغط هيعلي ودي بنستخدمها في حالات هبوط الضغط الشديده اوي يعني بتعمل ضغط oncotic pressure تسحب بيه المياه وكمان الجسم علي ما يكسرها ببياخد وقت وبالتالي المحاليل دي بتديني مفعول اطول
بس للاسف نادر جدا لما تستخدم علشان كذا سبب:-

– اولا انها غاليه جدا علشان البروتينات
– ثانيا علشان انا قولت ان التركيز العالي بيسحب مياه وتركيز البرويتنات كدا هيعلي في الدم وبالتالي هيسحب المياه من الخلايا للدم وحجم الدم هيزيد اي نعم لكن كدا هتسحب من الخلايا المياه والخلايا هيحصلها جفاف وتموت ودا خطر طبعا لكنها بردو يقال انها بتستخدم

زي الالبيومين 5%
– بيستخدم لزياده حجم الدم في حالات hypovolemic shock
– بيستخدم لمرضي الكبد الي عندهم نقص في الالبيومين
-وبيستخدم كتغذيه بالبروتين

امتي يبقي ممنوع المحاليل دي ؟
– الانيميا الشديده ” لانها هتعمل تخفيف كبير للدم وبالتالي هيقلل الاكسجين الي داخل للمخ وممكن يموت ”
– مريض فشل عضله القلب CHF لان اساسا هو عنده مياه زياده هنزودله الطين بله وحمل زايد علي القلب

————————
>>>>ثاني حاجه هتكلم عنها هي ال crystalloids :-<<<<<<

ودا بقي بيتكون من نفس تركيبه ال colloids بس مع فارق ان البروتين الي كان عامل مشكله دا شيلناه خالص وسيبنا الصوديوم والبوتاسيوم
عندي النوع دا crystalloids دا فيه منه ثلاث انواع :-

#Isotonic_solution
ودا تركيزه بيكون زي تركيز الدم يعني لما بنحقن بيه المريض بس بيزود حجم الدم بس من غير ما يسحب من الخلايا الخارجيه ويشد للاوعيه الدمويه زي صاحبنا ودا اغلب لمحاليل الي كلنا بنشوفها هي محاليل تركيزها عامل زي تركيز الدم بالضبط زي :-
– 0.9% sodium chloride (0.9% NaCl)
– lactated Ringers solution
– 5% dextrose in water (D5W)
– Ringers solution

ناخدهم واحد واحد

——————-
الاول (0.9% NaCl) :-
1- بيستخدم في حالات الـ low extracellular fluids زي النزيف او هبوط الضغط او الاسهال او الجروح او الترجيع
2- يستخدم في حالات هبوط مستوي الصوديوم نتيجه تسمم بعض الادويه كمدررات البول
3- وهو الاكثر استخداما لما نكون عاوزين ندي مريض دواء بس بمعدل معين اغلب الادويه بتكون متوافقه معاه

—————————
ثانيا lactated Ringers solution :-
ودا بيتكون من نفس تركيبه اخوه الي فوق دا ما عدا حاجه واحده مضافه اليه وهي sodium lactat وبوتاسيوم
عارف يعني ايه ؟؟ لا
طيب اقولك انا بقي 😀
اقولك ان المحلول دا كدا بيعالج الmetabolic acidosis
مين دا يا احاج 😀 بص يا سيدي الدم يعني لا هو حمض ولا قلوي
لكن فيه حالات مرضيه بيحصل فيها ارتفاع او انخفاض في قيمه ال ph ودي طبعا حاله مميته
ان شاء الله هيبقي هشرحه بعد كدا
في حاله انخفاض قيمه ph بيخلي الدم حامضي وباتالي زي ما قولت انها مميته لازم حاجه تضبطها فبنستخدم الرينجر لحالات معينه مش كل الحالات طيب ايه الطريقه ؟؟
انه بيحتوي علي sodium lactat ودي بتدخل الجسم تتكسر بالكبد وتتحول ال sodium bicarbonate قلووووي وبالتالي ترفع ال ph شويه ” خلي بالك بتتكسر في الكبد يعني ممنوع تديها لمرضي كبد ماشي يا دكتره ”
وخلي بالك بردو ان لو مريض كبد عنده acidosis وانت اديته رينجر اولا مش هيتكسر ويديك التاثير بانه يعالج ال acidosis
دا غير كمان ان ال lactat دي حمض يعني هتزود البله طين وممكن تموته
او زي ما بيقولوا جه يكحلها عماها 😀

وطبعا الحركه دي بتاثر علي النفس وهبقي اقول بعدين اذاي لكن مهم انك تعرف ان المريض ممكن يحس بضيق نفس
ببساطه علشان التنفس هيفقد co2 وثاني اكسيد الكربون مهم علشان يكون حمض ويوطي الph ف الجسم بيستجيب لللموضوع دا بانه يقلل من التنفس علشان يوطي ال ph تاني
وبردو حالات ال DKA diabetic keto acidosis
نتيجه وجود keton bodes الي بتوطي ال ph بتاعت الدم وبالتالي بستخدم هنا بردو الرينجر

قالو ان الرينجر ليه diuresis effect
ودي شرحها موال كبير اوي يا سي دوني هنخليها مع ادويه الضغط ان احياني الله وشرحتها

من مشاكله بردو انه بيمسك في المواد الي هي anticoagulant عارف يعني ايه بيمسك موانع التجلط يعني هسيب الدم يتجلط ودا risk factor يعني مينفعش مع المرضي الي pt بتاعه قليل

ثانيا اشهر تفاعل موجود علي الفيس بوك خلي بالك من السيفتريكازون والرينجر يا ولا
ليه يا عم
بيقول ان السيفترياكسون بيتفاعل مع الرينجر او الكالسيوم الي جو الرينجر وبعدين بيرسب
لذلك ننصح الساده المشاهدين بعدم اخذ حقنه السيفترياكسن مع الرينجر لاكن خلي وقت بينهم مثلا ست ساعات

وتخلي بالك من ان المحلول دا يحتوي علي بوتاسيوم ودا مع مرضي الفشل الكلوي مصيبه لان العيان ممكن يدخل منك في hyperkalemia ودي مصيبه

———————————-
ثالثا الـ Ringer solution نفس الي فوق بس معليهوش لاكتات وبالتالي معليهوش المحاذير الي تخس الاكتات

—————————————–
رابعا dextrose 2%
معروفه ديكستروز يعني سكر 😀 يا واد يا سكر ايوه هو يعني بعالج هبوط السكر
بس خلي بالك اوعي في يوم عقلك يقولك انه بيعلي الضغط اوعي احسن اعورك
الديكستروز بيخش جوه الخلايا وبيتسحب من الدم يعني مبياثرش علي الضغط بالنسبه الي زي اخواتها بيعملوها

#Hypertonic_solution
ودي تركيزها بيكون عالي عن الدم وبالتالي لما احقنها في الدم هترفع من تركيز الدم وهتزود حجمه يبقي لما تركيز الدم هيزيد هيعمل ايه ؟؟؟ ايوه زي الcolloids هيسحب المياه من الخلايا الي بره الجسم
بس فيه فرق طبعا بينه وبين الcolloids دا هيبقي هديه الي هيتابع المقال للاخر

طيب الاثنين دول بيزودو حجم الدم مع فارق الكفائه طبعا وبالتالي بستخدمهم في حاله هبوط الضغط

#hypotonic_solution
ودا بيخلي تركيز الدم اقل من الخلايا وبالتالي الخلايا هنا بتاعت الجسم بيبقي تركيزها اعلي فهي الي تسحب المياه من الدم وتخش الخلايا وفي الحاله دي بستخدمها علشان اعالج الجفاف الشديد باني باخد من الدم مياه وادخلها الخلايا علشان تعيش

مش كنت كل مره بعلي تركيز الدم وهو الي بيسحب المياه من الخلايا ؟؟ ايوه
طيب انا المره دي وطيت تركيز الدم وبكدا الخلايا هي الي هتسحب منه .. اااااااه تمام فهمت

يعني كدا الخلايا هتسحب المياه من الدم يعني حجم المحلول الي انا حقنته للمريض دا هيتقسم بالمناصفه علي الخلايا وعلي الدم يعني تاثير المحلول دا في علو الضغط هيكون بسيط
ايوه بالضبط كدا

#قبل_البدأ_بالمحاليل
لازم تكون عارف ال baseline vital signs يعني المريض دا
– ضغطه كام – فيه edema في الرئه ولا اي مكان في جسمه عن طريق سماع pulmonary crackles – فيه ضيف التنفس ولا لا
– سماع صدر المريض
-متابعه ضغطه ونبضه
— متابعه الـ skin turgor
– اخراجه للبول لو اقل من .5مل/كج/ساعه تبقي مشكله oligurea

لازم العلامات دي لو مش هتتابعها تعلم اهله اذاي يتابعوها علشان المريض ميا يدخلش في ال overload ويخصل مشكله في قلبه

#ملحوظه_عامه
كل المحاليل الوريديه مشكلتها الاساسيه العدوى لانها معليهاش مواد حافظه زي ما قولت ولانها بتدخل الجسم بكميه كبيره يعني كميه تدمر دا غير انها بيئه صالحه للعدوي

#سؤال_من_زميله
فيه زميله سالتني مره هو ليه ممكن يوصف محلول الdextrose الي هو سكر يعني ويحقن معاه انسولين ؟؟؟ يعني بيعلي سكر المريض ويحقن انسولين يوطيه ؟؟!! تفتكرو ليه
الصراحه انا كان توقعي علي الموضوع ان الانسولين بيعمل hypokalemia يعني بيقلل كميه البوتاسيوم الي في الدم والمريض دا غاليا كان عنده مشكله مع البوتاسيوم انه عالي
فبيدي انسولين يوطي البوتاسيوم وبيدي معاه سكر علشان ميحصلش هبوط في السكر وغيبوبه

اضافه :-
ان ال colloidal علشان استخدمهم لمريض يبقي لازم استخدم معاه لكل .5 لتر colloids بستخدم معاه 1.5 hypotonic solutions
بحيث اني اوازن تاثيره في الجفاف المزمن الي بيعمله ودا طبعا بروتوكول علاج

#اضافه_اخري
اخويا وصديقي العزيز الدكتور سيد فتحي بيقول :-
في حالات علاج هبوط السكر يفضل استخدام جلوكوز بتركيز 10% او 25%
تقريبا علشان يديني rapid control وفي نفس الوقت ما يزودش حجم الدم كتير ويعمل hypertension ويبقي باقل حجم عملت معادله للهبوط في السكر

الموضوع كدا انتهي واسالكم صالح دعائكم
لو استفدت بمعلومه اعمل شير للبوست فضلا وليس امرا علشان الغير يستفيد

ما تنساش تعمل شير للمحاضره علشان غيرك يستفيد
ولو فيه اي اضافه للكلام دا ممكن اتشرف باستقبالها

#مجهود شخصي متنوع المصادر من كتب كثيره ومراجع متعدده
Medscap- NCBI –drug .com

ادوية علاج هشاشة العظام

علاج جرثومة المعدة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *